ఏలూరు, BCN NEWS, ఏప్రిల్ 19: ఏలూరులోని ఆర్ఆర్ పేట శ్రీవేంకటేశ్వర స్వామివారి దేవస్థానంలో జరుగుతున్న 37వ వార్షిక బ్రహ్మోత్సవాలు ఘనంగా కొనసాగుతున్నాయి. ఈ బ్రహ్మోత్సవాల్లో పాల్గొనడం ఎంతో ఆనందంగా ఉందని ఏలూరు ఎమ్మెల్యే బడేటి చంటి తెలిపారు. భక్తులందరూ ఈ ఉత్సవాల్లో పాల్గొని స్వామివారి ఆశీస్సులు పొందాలని ఆయన ఆకాంక్షించారు.
శనివారం గరుడ పతాక ద్వజారోహణతో బ్రహ్మోత్సవాలకు అంకురార్పణ జరిగిన నేపథ్యంలో ఆదివారం ఎమ్మెల్యే బడేటి చంటి, ఆయన సతీమణి మీనా దంపతులు ముఖ్య అతిథులుగా హాజరయ్యారు. ఆలయ ప్రధాన అర్చకులు కిళాంబి మారుతీ శ్రీనివాస రామానుజాచార్యులు పూర్ణకుంభంతో వారికి ఘన స్వాగతం పలికారు. అనంతరం దంపతులు స్వామివారిని దర్శించుకుని ప్రత్యేక పూజలు నిర్వహించారు.
ఈ సందర్భంగా అఖండ దీపారాధనను వెలిగించి, వేద ఆశీర్వచనం అందుకున్నారు. ఆలయం దినదినాభివృద్ధి చెందుతుండటం సంతోషకరమని ఎమ్మెల్యే బడేటి చంటి పేర్కొన్నారు. ఆలయ అధికారులు, అర్చకులు, పాలకమండలి సభ్యులు కలిసి బ్రహ్మోత్సవాలను అంగరంగ వైభవంగా నిర్వహిస్తున్నారని అభినందించారు.
ఆలయ ప్రధాన అర్చకులు మాట్లాడుతూ, సుదర్శన చక్ర ప్రతిష్ట అనంతరం ఆలయ అభివృద్ధి వేగంగా జరుగుతోందని తెలిపారు. ఈ నెల 23వ తేదీ వరకు బ్రహ్మోత్సవాలు కొనసాగుతాయని, 21వ తేదీన మృగశిర నక్షత్రాన్ని పురస్కరించుకుని స్వామివారి కళ్యాణ మహోత్సవం నిర్వహించనున్నట్లు వివరించారు.
ఈ కార్యక్రమంలో ఏఎంసీ చైర్మన్ మామిళ్ళపల్లి పార్థసారథి, కో-ఆప్షన్ సభ్యులు, ఆలయ ధర్మకర్తలు, కార్పొరేటర్లు, అధికారులు, భక్తులు పెద్ద సంఖ్యలో పాల్గొన్నారు. నగర ప్రజలు అధిక సంఖ్యలో హాజరై భక్తి శ్రద్ధలతో స్వామివారిని దర్శించుకున్నారు.