దెందులూరు, BCN NEWS, ఏప్రిల్ 18: రాష్ట్ర ప్రభుత్వం ప్రతిష్టాత్మకంగా చేపట్టిన “జలధార” కార్యక్రమం ద్వారా చెరువుల పునరుద్ధరణకు ప్రత్యేక చర్యలు తీసుకుంటున్నట్లు దెందులూరు ఎమ్మెల్యే చింతమనేని ప్రభాకర్ తెలిపారు. పెదవేగి మండలం పినకడిమి గ్రామంలో శనివారం నిర్వహించిన “జలధార – జల హారతి” కార్యక్రమంలో ఆయన ముఖ్య అతిథిగా పాల్గొన్నారు. ఈ సందర్భంగా గ్రామస్థులకు జల సంరక్షణ ప్రాధాన్యతను వివరించారు.
కార్యక్రమంలో భాగంగా ఎమ్మెల్యే పినకడిమి చెరువును సందర్శించి పూడికతీత, మరమ్మత్తు పనులను క్షేత్రస్థాయిలో పరిశీలించారు. వర్షాకాలం రాకముందే నియోజకవర్గంలోని అన్ని చెరువుల్లో పూడికతీత పనులు పూర్తి చేయాలని అధికారులను ఆదేశించారు. వర్షపు నీరు వృథా కాకుండా నిల్వ ఉండేలా చర్యలు తీసుకోవడం ద్వారా భూగర్భ జలాల మట్టం పెరుగుతుందని, రైతులకు సాగునీటి సమస్యలు తగ్గుతాయని తెలిపారు.
నిడదవోలులో ముఖ్యమంత్రి నారా చంద్రబాబు నాయుడు ప్రారంభించిన “జలధార – జల హారతి” కార్యక్రమం విశిష్టతను కూడా ఎమ్మెల్యే ప్రజలకు వివరించారు. నీటి సంరక్షణ ప్రతి ఒక్కరి బాధ్యత అని, భవిష్యత్తు తరాల కోసం జల వనరులను కాపాడాలని పిలుపునిచ్చారు. దెందులూరు నియోజకవర్గాన్ని జలవనరుల విషయంలో స్వయం సమృద్ధిగా మార్చేందుకు కృషి చేస్తున్నామని వెల్లడించారు.
గత కొంతకాలంగా నిర్లక్ష్యానికి గురైన చెరువులను పునరుద్ధరించి పూర్వ వైభవానికి తీసుకువస్తున్నామని ఎమ్మెల్యే తెలిపారు. చెరువు కట్టల బలపరిచే పనులు చేపట్టి సాగునీరు, తాగునీరు అందుబాటులో ఉండేలా చర్యలు తీసుకుంటున్నామని చెప్పారు. ప్రజలకు ఎటువంటి నీటి కొరత లేకుండా చేయడమే ఈ కార్యక్రమం ప్రధాన లక్ష్యమని స్పష్టం చేశారు.
ఈ కార్యక్రమంలో జలవనరుల శాఖ అధికారులు, ఇతర శాఖల ఉన్నతాధికారులు, ప్రజా ప్రతినిధులు, కూటమి నాయకులు మరియు గ్రామస్థులు పెద్ద సంఖ్యలో పాల్గొన్నారు. కార్యక్రమం ద్వారా గ్రామాల్లో జల సంరక్షణపై అవగాహన మరింత పెరిగిందని అధికారులు తెలిపారు.