దెందులూరు, BCN NEWS, ఏప్రిల్ 18: పరిశుభ్రమైన గ్రామాల ద్వారానే ఆరోగ్యవంతమైన సమాజం నిర్మాణం సాధ్యమని దెందులూరు ఎమ్మెల్యే చింతమనేని ప్రభాకర్ పేర్కొన్నారు. రాష్ట్ర ప్రభుత్వం చేపట్టిన “స్వచ్ఛ ఆంధ్ర – స్వర్ణ ఆంధ్ర” కార్యక్రమంలో భాగంగా పెదపాడు మండలం కొత్తూరు గ్రామంలో శనివారం ఘనంగా కార్యక్రమం నిర్వహించారు. “స్వచ్ఛ దెందులూరు” పేరుతో జరిగిన ఈ కార్యక్రమంలో ఎమ్మెల్యే ముఖ్య అతిథిగా పాల్గొని ప్రజల్లో శుభ్రతపై అవగాహన కల్పించారు.
ఈ సందర్భంగా ఎమ్మెల్యే చింతమనేని ప్రభాకర్ స్వయంగా గ్రామ వీధుల్లో పర్యటిస్తూ చెత్తను సేకరించారు. ప్రజా ప్రతినిధులు, అధికారులు, గ్రామస్తులతో కలిసి శ్రమదానం చేయడం ద్వారా అందరికీ ఆదర్శంగా నిలిచారు. ఆయన స్వయంగా పాల్గొనడంతో గ్రామస్థుల్లో ఉత్సాహం మరింత పెరిగింది.
గ్రామాల్లో పారిశుధ్యాన్ని బలోపేతం చేయడానికి 23 చెత్త సేకరణ వాహనాలను ఎమ్మెల్యే జెండా ఊపి ప్రారంభించి వివిధ గ్రామాలకు పంపిణీ చేశారు. పారిశుధ్య సిబ్బందితో మాట్లాడిన ఆయన, గ్రామాల్లో ఎక్కడా చెత్త కుప్పలు ఉండకుండా చర్యలు తీసుకోవాలని ఆదేశించారు. తడి చెత్త, పొడి చెత్తను వేర్వేరుగా సేకరించే విధానంపై ప్రజలకు అవగాహన కల్పించాలని సూచించారు.
కార్యక్రమానికి ముందు స్వర్గీయ ఎన్టీఆర్ విగ్రహానికి ఎమ్మెల్యే పూలమాల వేసి ఘనంగా నివాళులు అర్పించారు. అనంతరం అధికారులు, నాయకులు, విద్యార్థులు, మహిళలు, గ్రామస్తులతో కలిసి భారీ ర్యాలీ నిర్వహించారు. ఈ సందర్భంగా గ్రామాన్ని పరిశుభ్రంగా ఉంచుకుంటామని అందరితో స్వచ్ఛత ప్రతిజ్ఞ చేయించారు.
ఈ సందర్భంగా ఎమ్మెల్యే మాట్లాడుతూ, స్వచ్ఛత కేవలం ప్రభుత్వ బాధ్యత కాదని ప్రతి పౌరుడి కర్తవ్యమని తెలిపారు. ఇళ్లతో పాటు పరిసరాలను కూడా పరిశుభ్రంగా ఉంచుకోవాలని, ప్లాస్టిక్ వినియోగాన్ని తగ్గించాలని ప్రజలను కోరారు. పర్యావరణ పరిరక్షణకు అందరూ కలిసి పనిచేయాలని పిలుపునిచ్చారు.
ఈ కార్యక్రమంలో ప్రజా ప్రతినిధులు, కూటమి నాయకులు, అధికారులు, సిబ్బంది, కార్యకర్తలు మరియు గ్రామస్తులు పెద్ద సంఖ్యలో పాల్గొన్నారు. కార్యక్రమం ద్వారా గ్రామాల్లో పరిశుభ్రతపై చైతన్యం మరింత పెరిగిందని అధికారులు తెలిపారు.